يالله ياللـي كـل حــيٍ يسـالـك

يا واحـدٍ كـلٍ يخافـك ويرجيـك

يا قاسـم انـوال المـلا من نـوالك

وقبضة نواصي الخلق كلهن بيـاديك

اتفـك عقد احبـال عبـدٍ شكـا لك

مستبـرمٍ حبلـه بعقـد الشرابيـك

بعيدٍ عن الدانـي دعـا والتجـا لك

يا من هو المـالك وحنـا الممـاليك

ارمـي بحـالاتـي لذيـك التهـالك

تفرج عن القلـب الذي فيه تشكيـك

ما به مـن الحرفـات الا الدعـا لك

والحيل قصـر والأيـادي مفاليـك

فيلا اقتضى عسري بحسن الرضا لك

فاجعل لنا صبرٍ على العسر يرضيك

سايلت داعي البيـن مالـي ومـالك

من كل صـوبٍ كاثـراتٍ دعاويـك

قال إن هـذا الأمـر لا لـي ولا لك

أمرٍ قضـاه آلهـك اللـي مسويـك

لا تعتـرض أم القـدر في جـدالك

ولا تحسب إن اللي مصيبك بيخطيك

قسمة احظوظ الخلق قسم السـوا لك

ومكتوب حظك يالفتى في نواصيـك

جف القلم باللـوح فيمـا اقتضـا لك

إمـا سعيـد الحــظ وإلا مشقيـك

وأنا اشهـد أن اللي كتب لك ينـالك

يالعبـد ربك باسـم حظـك يناديـك

كـلٍّ بتقديـر الولـى طـاب فـالك

اصبـر علـى ما قـدر الله يأتيـك

ولا تلـوم النفـس فيـما جـرا لك

تبور غالـي سلعتـك بيـن أياديـك

ويلومـك اللي مـادرا عن حـوالك

ولا درا ويش الدهـر محـدثٍ فيـك

محدٍ درا ويش الذي صـاب حـالك

وما جـرا لك مع صديـقٍ معاديـك

بمكـايـده يبلـن الأيـام حــالك

وعن المـوارد قاصـراتٍ مداليـك

ما شام بك من ديرتـك عن عيـالك

وما عرضك درب الخطر والتهـاليك

وين انت والأقـدار يـوم ارتحـالك

في وسط غباتٍ بها المـوج عاليـك

مـرٍ يميـن ومـرةٍ مـن شمـالك

والعرب من التريـك تاخـذ بيـاديك

إن قيل رد البـوش واربط احبـالك

ضاقـت على احرارهـا والمماليـك

فاعزم وشـم ولا تضيـق المسـالك

ولا تسـوي يافتـا شومـت الديـك

وافهم نبا ما أقـول لك طـاب فـالك

سعود الفتى بالحظ من غير تشكيـك

وإن جاد حظـك باع لك واشتـرا لك

فوايـده من كـل الأبـواب تاتيـك

وإن بـار بـك دلاّ يهـزل حـلالك

وبردا الثمن لزماً يبيعـك ويشـريك

وإن جاد حظك بالمجالـس حكـالك

وصـدق مقـالك كـلٍ لك يحاكيـك

وإن بـاربـك دلاّ يكــذب مقـالك

وتصير كذبات المـلا كلهـن فيـك

وإن جاد حظـك بالمنـازل بنـا لك

بيتٍ رفيعٍ شامـخ الطـول يذريـك

وإن بار بك خـلاك تنقـل اعيـالك

مـن دار إلـى دار ودارٍ اتجليــك

وإن جاد حظك كل شـيءٍ صفـا لك

وقرايـب الخـلان كلـن يصافيـك

وان بار بك بيـن جميـع العـدا لك

وصار المحب اعدا عـدوٍ يعاديـك

وإن جاد حظـك كل شـيءٍ عنـالك

ويباشـرك عنـد المـوده ويعطيـك

وإن بار بك ضليـت محـدٍ بحـالك

ولا بفنجـالٍ مـن البــن يسقيـك

وإن جاد حظك قام واطلـق اعقـالك

ومشـا معـك في كل دربٍ يبـاريك

وإن بار بك جـود متيـن الثنـا لك

وعن كل دربٍ لك يعقلـك ويثنيـك

وإن جاد حظك كل شـيءٍ زهـا لك

حليـاه بـرواح المجالـس تزهيـك

وإن بار بك شيـن حلايـا خيـالك

إلى اقبلت تغضى كل عينٍ تراعيـك

وإن جاد حظك كل شـيءٍ أضـا لك

يشبـه فـم القنديـل نـوره يقديـك

وإن بار بك عزيـل حالـي وحـالك

ارذل رذيـلٍ هافـي الجـد يوذيـك

يالعبـد لو كثـرت حـث ارتحـالك

وعرضتها درب الخطـر والتهـاليك

تـازي بـلا حـظ بعيـدٍ محـالك

وقلوص عزمـك بالمهامـه اتخليـك

تسعيـن عـام يافتـى مـا بـدا لك

ولا لاح في بـالك لـزومٍ يصافيـك

قل ول يا حظـي على ما جـرا لك

إلى قل عونـك ماجتهـادك بيغنيـك

اكتـب مكاتيـب الشقـا والعنـا لك

قل ول يا حظ الشقى اتعبت راعيـك

يا حظ لو ذيـب المفالـي عـوا لك

في مجلسٍ حاويه صـوتٍ يعـاويك

يقـول لـو حظـك سعيـدٍ نمـا لك

لو عشـرة اولادك عضيـدٍ يكفيـك

واليـوم لا تأمـن يمينـك شمـالك

يبـوقـك اصـدق صديـقٍ يماليـك

ولا يغـرك إن لقــاك وحكـا لك

لو عطـالك من المواثيـق يرضيـك

اخذ الحذر كل الحـذر لو صفـا لك

عيبٍ على انك تأمن الخصـم ياليـك

تحرز بسو الظـن وابصـر بحـالك

واحذر جليسٍ ضايع الـراي يعميـك

من سو طبعه إن حكا بـك حكـا لك

يرضي عدوك بالنميمـة ويرضيـك

راعي المكر والبوق والكذب سـالك

وراعي الثنا ضاقت عليه المسـاليك

يمشـي ورأيـه ضايـعٍ بالمهـالك

لا شاف من دونه على الوكر عاليك

ما تنظـر الأقـدار فيـما جـرا لك

شيـوخ القبايـل يتبعـون الممـاليك

فاعزم بعـون الله علـى ما بـدا لك

واقصد إله العرش حسبـك ويكفيـك

صاروا ابطن اللحـود ارض فمـالك

صبرٍ فهل منـهم صديـقٍ يعزيـك

لا بأس لو من كل طـرفٍ جـرا لك

هامي سحاب الوجد من فوق خـديك

يا قلـب هيـد عن تذكـر احـوالك

واصبر عسى رب الملا يعتنـي فيك

اصبر عسى تعطا خلـف ما غدا لك

رجلٍ إلى سامتـك الأيـام يشـريك

يـارب تجعـل واحـدٍ من رجـالك

عند الشدايـد مزبـن اللـى يـواليك

في يوم ما تعطـي يمينـك شمـالك

مثـقال حبـة خـردلٍ من حسـانيك

تعطيني مقصودي وأنا اللى أسـالك

يا سامـعٍ من جـا لبابـك ينـاديك

واختـام ملفوضـي لنـا في مقـالك

ازكى صلاة إلى هادي الرشد هاديك