يالله ياللي تسجـد الخلـق لرضـاه

يا وامـرٍ خلقـه علـى حـج بيتـه

تفرج لمن سدّه على الناس ما ابـداه

راضي على مقسومك اللي عطيتـه

من شي يسل الحال والجسـم يبـراه

والنـاس ما يشفـون إن ما شفيتـه

قلـت آه واجرحـاه مـن خلتـي آه

وان حملونـي حمـل غـيٍ قويتـه

قالـوا سفا بالحال ويش اللي اغـواه

قلـت آه ويش المنكـر اللي وطيتـه

قالـوا جهلـت وبان علمك لمنهـاه

قلـت آه علمـي يا مـلا ما كميتـه

قالـوا طلبنـا لك مـن الله معافـاه

قلـت آه وحدتـه وعفـوه رجيتـه

قالـوا هله واحبـاب عينه نصحنـاه

قلـت آه هــذا واردٍ مـا بغيتــه

قالـوا نـدور لك من البيض حليـاه

قلـت آه لو غيـره بكفـي رميتـه

قالـوا نشـاش العـود مالك بلامـاه

قلـت آه عود الموز بيـدي لويتـه

قالـوا تـزوج كود تدلـه وتنسـاه

قلـت آه لو اخذت اربـعٍ ما نسيتـه

قالوا من اقصى الناس وين انت واياه

قلـت آه ما آنسى يوم جاني وجيتـه

قالـوا نشوفـه عنـد هـذا وهـذاه

قلـت آه عمره ما عقب حجر بيتـه

قالـوا عليـلٍ نـاقـلٍ داه بــرداه

قلـت آه باقرابـي وروحـي فديتـه

قالـوا نشيـر ولا نفـع ما حكينـاه

قلـت آه هـراج النمايـم عصيتـه

قالـوا كثر شيبـك وقلبـك بعميـاه

قلـت آه لـو قلبـي غريـرٍ نهيتـه

مطــاوعٍ قلبـي بعجفــاه وقـداه

والى عطـى منهـاج دربٍ عطيتـه

ياناس خلـوا كـل وادي ومجـراه

قلتـوا كثيـر وقـولكـم ما لقيتـه