عشقت القمر حيث القمر ينبعث به نور

وأخص الليالي البيض تزهاه ويزهنّـه

واحب الهوى لاهب من خايعٍ ممطـور

وريح النفل حيث النفل طيـب الخنّـه

واحب الجمالة والجمالة عمل مبـرور

واحب الغناه واعز نفسـي عن المنّـه

واحب الصّراحة والصّراحة بها مسرور

حيث أن الصّراحة تقطع الشك والظنّـه

واحب الكريم اللي يفرج عن المعسـور

اليا من عطا حتى أهلـه ما دروا عنّـه

واحب الرجال العارفة واكره المغـرور

من اغتر في بعض المظاهـر يغرنّـه

سقا الله ليالٍ ماضية قبـل هدم السـور

نحفر العدود ونشرب الماء من الشنّـه

نشوف البنات اليا أوردن كنهم الحـور

مهـار مشـاويلـن بالأعيـاد معتنّـه

على الماء تشوف بيوتهم كنهن القـور

كثيـر القبايـل تقطـن العـد بالكنّـه

على البال ذكراها ياليـت الليالـي دور

ياليـت الليالـي مـا خذنـه يجيبنّـه

تذكـرت شيبـانٍ لنا يوم حنـا بـزور

يحثوننا بالطيـب والفـرض والسنّـة

لو عاشوا حياة قاسية في بحر وبـرور

عسى الله يعوضـهم بما فـات بالجنّـة

لو دورن مضى من بينهم وين ذاك الدور

زمـان مضـى لـه ذكريـات يحلنّـه

يوم الذهب ما يلبسونه بـدون خصـور

جمال النسا ما هو من السـوق يشرنّـه

فقدنا حياة البـدو مع شوفـة المظهـور

ولا عاد به بدو ولا الطـرش له حنّـه