حي الجواب اللي لفانـا من الـرأس

جابـه غـلامٍ ما تـوانـا مسيـره

أهـلاً هـلا عد ما حبـك قرطـاس

أو ما كتب فوقه من بيوت شطيـره

جواب من هو لي مـودٍ من النـاس

أبـوي ما يوصـف حلـيٍ الغيـره

فرز الوغى كنه على الوكر قرنـاس

اقـروم ربعـه كلــها تستشيـره

دليـل عيـراتٍ إلى هـب نسنـاس

ثـم ادلـهم الجـو ومابـه ذخيـره

مهفي الغنم لأهل الركايب والأفراس

لا راوحـوا بيتـه عليـهم قصيـره

راعي معاميـلٍ بها العبـد جـلاّس

للبـن يشـري بالسنيـن العسيـره

هـذي بمركاهـا وهـذي بمحمـاس

وهـذي يصبـه للوجيـه السفيـره

وخلاف ذا يا راكبٍ فـوق عرمـاس

مأمونـةٍ من نقـوة الهجـن عيـره

حمرا وهي في سنّـها وقم الأسـداس

متوسطٍ لا فاطـر ولا هي صغيـره

ما هي لحوح راكبه بالعصـا قـاس

حرّم عليـها غيـر شيـل النجيـره

والخرج هو وبيوت قيـلٍ بقرطـاس

مع مزهـب الأيـام ما هي كثيـره

وفوقه غلام منوته قطـع الأرمـاس

لو هـو بليـل مـا تغيـر نظيــره

وليا لفيت الدار فاجهـر بالاحسـاس

وبلّـغ سلامـي كل ذيـك العشيـره

واختص أبوي اللي نفل جملة النـاس

وخصه بعلـم وقل ترانـي بشيـره

لا يا نجي العـرض يا بوي لابـاس

إن كان تشتكي الضيم فأنـا أسيـره

وإن سايـلك عني ترانـي بنومـاس

وأنا أحمـد اللي ما توسلـت غيـره

المدح لو يشـرى شرينـاه بأكيـاس

بأموالنا نرخـص نـدور الستيـره

مطرق افرنجي مضاريبـه الـراس

ومصلبـخٍ جبتـه عسانـي ذخيـره

من صنع نصراني مشروبه الكـأس

يـذكـر ورا جـاوه بعيـد مسيـره

أبغيـه للّـي حادينـك على السـاس

أهـل النمـايـم والحكايـا الكثيـره

ربعٍ نـوو فيـك الـردا والتخسـاس

مهبـول يا اللي قال غايـب عشيـره

علي حـق لـودع الجمـع ينحـاس

لين العشيـر يقـوم يلعـن عشيـره

يا بوي أنا ما رحت ادور كيفة الراس

مـع ذا ولانـي في سفـاهٍ أو غيـره

إن ما سكنّا الدار من غير هوجـاس

والا نعـاف الـدار وانـدور غيـره

كلـه لعيـن كلمـةٍ قلـت يا دبـاس

تشكي وأنا دونـي بحـورٍ غزيـره

خذ لك يمين الشّرع قطّـاع الأنفـاس

إنـه فـلا جتنـي علـومٍ بصيـره

لا نب جانـي ولا حبـرٍ وقرطـاس

أيضـا ولا جتنـي علـومٍ سفيــره

وان كان تشكي الضيق يا بوي لاباس

جاك الفـرج يا بوي هو والبريـره

يا مسندي يا بوي شوف اوكد النـاس

ثم انشـده قل ويـش هو في مسيـره

إن كان ما يفرح صديقـك ابنومـاس

تحرم علينـا اللـي نهـوده صغيـره

مدلـول مجـهول زها زين الألبـاس

وهي بنت من يثني ليا جـت كسيـره

طار يقول اظهـر وطـارٍ ابجـلاس

قمت أشرب التنبـاك واثـره نكيـره

أبغي عسى الله يبرد القلـب يا نـاس

من لا هـبٍ شبّـت بقلبـي سعيـره

و الا فانا يا بـوي قطـاع الأرمـاس

أصبـر على الشّـده لو هي عسيـره

ومن كان له غايب فلا يقطـع اليـاس

إن قـدَّر الله جـاب علمـه بشيــره